ڈی جی آئی ایس پی آر: بھارت نے پاکستان کو غیر مستحکم کرنے کے لیے دہشتگردی کو ریاستی پالیسی بنا لیا ہے

پاک فوج کے ترجمان، ڈائریکٹر جنرل آئی ایس پی آر لیفٹیننٹ جنرل احمد شریف چوہدری نے ایک غیر ملکی ٹی وی چینل کو انٹرویو دیتے ہوئے بھارت پر شدید الزامات عائد کیے ہیں۔ انہوں نے کہا کہ بھارت نے دہشتگردی کو پاکستان کے خلاف بطور ریاستی پالیسی اختیار کر رکھا ہے اور وہ ملک کے اندر دہشتگرد کارروائیوں کی حمایت اور مالی معاونت کر رہا ہے، خاص طور پر بلوچستان کو غیر مستحکم کرنے کے لیے۔

لیفٹیننٹ جنرل احمد شریف چوہدری نے کہا کہ “یہ الزامات بے بنیاد نہیں ہیں بلکہ اس کے ناقابل تردید شواہد موجود ہیں کہ بھارت منظم منصوبہ بندی کے تحت پاکستان میں دہشتگردی کو ہوا دے رہا ہے۔”

انہوں نے کہا کہ بھارتی سیاسی قیادت کئی بار کھلے عام پاکستان میں دہشتگردی کی پشت پناہی کا اعتراف کر چکی ہے۔ انہوں نے مزید بتایا کہ امریکا اور کینیڈا سمیت کئی ممالک بھی بھارتی ریاستی دہشتگردی کو تسلیم کر چکے ہیں۔ ان کے مطابق اس نیٹ ورک کا ماسٹر مائنڈ بھارتی قومی سلامتی کے مشیر اجیت دوول ہے۔

ڈی جی آئی ایس پی آر نے پاکستان کی دفاعی صلاحیتوں پر اعتماد کا اظہار کرتے ہوئے کہا کہ “پاکستان ایک ذمہ دار اور اعلان شدہ ایٹمی طاقت ہے۔ ہمارا ایٹمی پروگرام مکمل طور پر محفوظ ہے اور کوئی بھی ملک اسے نشانہ بنانے کی جرات نہیں کر سکتا۔ یہ پاکستان کی دفاعی حکمت عملی اور خطے میں توازن کی علامت ہے۔”

انہوں نے مذہب کے نام پر ہونے والے مسلح تصادم کے حوالے سے واضح کیا کہ اسلام میں جہاد یا قتال کا اختیار صرف ریاست کو حاصل ہے، کسی فرد، تنظیم یا گروہ کو یہ حق حاصل نہیں۔ انہوں نے کہا کہ “خوارج کا نظریہ اسلام، انسانیت، پاکستان یا ہماری روایات سے کوئی تعلق نہیں رکھتا۔”

ڈی جی آئی ایس پی آر نے بتایا کہ پاکستانی فوج اور میڈیا میں ان انتہاپسند عناصر کو “خوارج” کہا جاتا ہے جبکہ “فتنۂ ہندوستان” کی اصطلاح ان دہشتگردوں کے لیے استعمال ہوتی ہے جو بھارت کی سرپرستی میں کام کرتے ہیں اور خاص طور پر بلوچستان میں پاکستان کو غیر مستحکم کرنے کی کوششوں میں مصروف ہیں۔

انٹرویو کے دوران انہوں نے ایران کے لیے پاکستان کی سیاسی و سفارتی حمایت کا اعادہ بھی کیا اور خطے میں امن و استحکام کے لیے تعاون پر زور دیا۔