کراچی: ڈیفنس کے فلیٹ سے اداکارہ حمیرا اصغر کی کئی روز پرانی لاش برآمد

معروف ٹی وی اداکارہ حمیرا اصغر علی کی لاش کراچی کے علاقے ڈیفنس فیز 6 کے ایک فلیٹ سے انتہائی خراب حالت میں برآمد ہوئی۔ یہ افسوسناک واقعہ منگل کی سہ پہر ایک عدالتی حکم پر فلیٹ خالی کروانے کے دوران پیش آیا۔

پولیس کے مطابق، یہ کارروائی سہ پہر تقریباً 3 بج کر 15 منٹ پر کی گئی، جب عدالتی بیلف اور پولیس اہلکار اتحاد کمرشل میں واقع فلیٹ کو خالی کرانے کے لیے پہنچے۔ دروازہ کھٹکھٹانے کے باوجود کوئی جواب نہ آنے پر اہلکاروں نے دروازہ توڑا۔ اندر داخل ہونے پر اداکارہ کی لاش فرش پر پڑی ملی۔

پولیس حکام نے بتایا کہ حمیرا اصغر گزشتہ سات برس سے اس فلیٹ میں تنہا رہائش پذیر تھیں۔ ابتدائی تفتیش کے مطابق، لاش 15 سے 20 دن پرانی ہے اور گل سڑ چکی تھی۔

پولیس نے فلیٹ سے شواہد اکٹھے کر لیے ہیں اور لاش کو فوری طور پر پوسٹ مارٹم کے لیے اسپتال منتقل کر دیا گیا ہے۔

پولیس سرجن ڈاکٹر سمیعہ کے مطابق، خاتون کی لاش اسپتال لائی گئی تو وہ شدید طور پر مسخ شدہ حالت میں تھی۔ “ہم نے ضروری حیاتیاتی نمونے حاصل کر لیے ہیں، جبکہ موت کی اصل وجہ پوسٹ مارٹم رپورٹ آنے کے بعد ہی معلوم ہو سکے گی،” انہوں نے بتایا۔

ابتدائی طور پر فلیٹ میں زبردستی داخل ہونے یا تشدد کے نشانات نظر نہیں آئے، تاہم لاش کی حالت اور وقت گزرنے کی وجہ سے فی الحال کوئی حتمی رائے قائم نہیں کی جا سکتی۔ پولیس حکام اداکارہ کے فون ریکارڈ، سی سی ٹی وی فوٹیج اور قریبی مکینوں سے معلومات حاصل کر رہے ہیں۔

حمیرا اصغر نے کئی ٹی وی ڈراموں میں کام کیا اور شوبز انڈسٹری میں ایک پہچانی جانے والی شخصیت تھیں۔ ان کی پراسرار موت نے مداحوں اور ساتھی فنکاروں کو غمزدہ کر دیا ہے۔

پولیس نے واقعے کو مشکوک قرار دیتے ہوئے کہا ہے کہ فطری موت، خودکشی یا قتل، تمام امکانات کو مدِنظر رکھتے ہوئے مکمل تحقیقات کی جا رہی ہیں۔ حتمی نتیجہ پوسٹ مارٹم رپورٹ کے بعد سامنے آئے گا۔