قاسم اور سلیمان سیاست میں آنا چاہیں تو کوئی رکاوٹ نہیں، عمر ایوب

پاکستان تحریک انصاف (پی ٹی آئی) کے مرکزی رہنما عمر ایوب نے کہا ہے کہ عمران خان کے بیٹے قاسم اور سلیمان اگر سیاست میں آنا چاہیں تو انہیں کسی نے روکا نہیں، وہ جب چاہیں سیاست میں قدم رکھ سکتے ہیں۔

جیونیوز سے گفتگو کرتے ہوئے عمر ایوب نے کہا کہ قاسم اور سلیمان جب بھی سیاست میں آئیں گے، انہیں خوش آمدید کہا جائے گا۔ انہوں نے کہا کہ سیاست آسان نہیں ہوتی اور اکثر مشکل حالات کا سامنا کرنا پڑتا ہے، تاہم بانی پی ٹی آئی کے بیٹے مضبوط ہیں اور ان حالات کا مقابلہ کرنے کی صلاحیت رکھتے ہیں۔

پی ٹی آئی کی احتجاجی حکمت عملی کے بارے میں سوال کے جواب میں عمر ایوب نے بتایا کہ 5 اگست کو عمران خان نے ہدایت دی تھی کہ احتجاج مقامی سطح پر کیا جائے۔ انہوں نے کہا، ’’اگر بانی پی ٹی آئی یہ ہدایت دیں کہ اسلام آباد نہیں جانا، تو ہم کون ہوتے ہیں ان کے حکم کے خلاف جانے والے۔‘‘

عمر ایوب نے پنجاب پولیس پر ظلم و بربریت کا الزام لگایا اور کہا کہ ماضی میں حکومت سے مذاکرات کی کوشش کی گئی تھی لیکن یہ کوششیں بے نتیجہ ثابت ہوئیں کیونکہ حکومت بے بس نظر آئی۔ انہوں نے کہا، ’’پنجاب میں حکومت اپنی مرضی کا پٹواری بھی تعینات نہیں کر سکتی، تو ان سے مذاکرات کا کیا فائدہ؟‘‘

عمران خان کی قید سے رہائی کے حوالے سے انہوں نے کہا کہ ان کے علم میں ایسا کوئی پیشکش نہیں آئی۔ ’’اگر کوئی ڈیل پیش بھی کی گئی تو عمران خان اسے قبول نہیں کریں گے،‘‘ انہوں نے دوٹوک مؤقف اپناتے ہوئے کہا۔

یہ گفتگو خیبر پختونخوا کے گورنر کے حالیہ بیان کے بعد سامنے آئی، جس میں انہوں نے خبردار کیا تھا کہ اگر قاسم یا سلیمان پاکستان کے آئین و قانون کی خلاف ورزی کریں تو انہیں دیگر شہریوں کی طرح گرفتار کیا جائے گا۔ گورنر کا یہ بیان سیاسی تناؤ اور پی ٹی آئی کارکنوں کے احتجاج کے تناظر میں سامنے آیا ہے جو بانی جماعت کی رہائی کا مطالبہ کر رہے ہیں۔

اس دوران یہ بھی اطلاع ملی کہ عمران خان کے بیٹے، جو حال ہی میں اپنے والد کی رہائی کی مہم کے لیے امریکا گئے تھے، لندن واپس پہنچ گئے ہیں۔ ان کا یہ دورہ پی ٹی آئی سے وابستہ افراد کی بین الاقوامی کوششوں کا حصہ سمجھا جا رہا ہے، جس کا مقصد عمران خان کی قید اور پاکستان کی موجودہ سیاسی صورتحال پر توجہ مبذول کرانا ہے۔