پینٹاگون نے قطر میں امریکی العدید ایئر بیس پر ایرانی میزائل حملے کی تصدیق کر دی، تباہی کی سیٹلائٹ تصاویر جاری

امریکی محکمہ دفاع (پینٹاگون) نے تصدیق کی ہے کہ ایران نے 23 جون 2025 کو قطر میں واقع امریکی زیرِ استعمال العدید ایئر بیس پر بیلسٹک میزائل حملہ کیا تھا۔ حملے میں امریکی مواصلاتی نظام کی حفاظت کرنے والے ڈوم کو نشانہ بنایا گیا، جبکہ تباہی کی سیٹلائٹ تصاویر بھی منظرِ عام پر آ چکی ہیں۔

پینٹاگون کے مطابق، ایران نے بیلسٹک میزائل کے ذریعے امریکی فوج کے مواصلاتی نظام کو محفوظ بنانے والے اہم ڈھانچے کو نشانہ بنایا۔ حملے سے ڈوم کو شدید نقصان پہنچا اور حساس مواصلاتی سرگرمیاں وقتی طور پر متاثر ہوئیں۔

سیٹلائٹ سے لی گئی قبل اور بعد کی تصاویر، جو عالمی میڈیا میں گردش کر رہی ہیں، میں واضح طور پر دیکھا جا سکتا ہے کہ حملے سے پہلے ڈوم سالم حالت میں موجود تھا جبکہ حملے کے بعد مکمل طور پر تباہ ہو چکا ہے۔

یہ واقعہ خطے میں ایران کی فوجی حکمت عملی میں ایک اہم پیش رفت کے طور پر دیکھا جا رہا ہے۔ قطر کی حکومت کی جانب سے تاحال اس حملے پر کوئی باضابطہ ردعمل سامنے نہیں آیا، تاہم بین الاقوامی ذرائع ابلاغ کا کہنا ہے کہ یہ حملہ ایران کا امریکا اور اسرائیل کے ساتھ بڑھتی کشیدگی کا ردعمل تھا۔ واقعے کے فوراً بعد ایران اور اسرائیل کے درمیان 12 روزہ جنگ شروع ہوئی، جو بعد ازاں سیزفائر پر ختم ہوئی۔

امریکی صدر ڈونلڈ ٹرمپ نے اس حملے پر ردعمل دیتے ہوئے کہا تھا کہ ایران نے حملے کا عندیہ دے دیا تھا، جس کے باعث امریکا اور قطر کو بیس خالی کرنے کا موقع مل گیا، اور ممکنہ جانی نقصان سے بچا جا سکا۔

دفاعی ماہرین کے مطابق، یہ حملہ ایران کی بڑھتی ہوئی میزائل صلاحیت اور اس کی امریکی فوجی تنصیبات کو براہ راست نشانہ بنانے کی حکمت عملی کی عکاسی کرتا ہے۔ العدید بیس خطے میں امریکی فوج کی اہم ترین تنصیبات میں شمار ہوتی ہے، اور اس حملے نے امریکی عسکری اثاثوں کی کمزوری کو بھی اجاگر کیا ہے۔

ابھی تک قطر کی جانب سے اس حملے پر کوئی سرکاری بیان جاری نہیں کیا گیا، تاہم تجزیہ کار اسے خطے کی سلامتی کے لیے ایک سنگین خطرے کے طور پر دیکھ رہے ہیں، خاص طور پر امریکی فوجی موجودگی کے حوالے سے۔