میر طارق حسین بگٹی اور سرفراز بگٹی کی ملاقات ،کھیل کے فروغ پر گفتگو

میرطارق حسین بگٹی پاکستان ہاکی فیڈریشن کا مثبت چہرہ ثابت ہونگے، سرفراز بگٹی
صدر پاکستان ہاکی فیڈریشن میر طارق حسین بگٹی نے سینیٹر و سابق وزیر داخلہ پاکستان میر سرفراز بگٹی سے ملاقات کی جس میں کھیلوں کو فروغ ینےپر بات چیت کی گئی ۔اور اس میں جاری اعلامیہ کے مطابق صدر پی ایچ ایف میر طارق حسین بگٹی نے گذشتہ روز سینیٹر و سابق وزیر داخلہ پاکستان میر سرفراز بگٹی سے اسلام آباد میں ملاقات بھی کی۔
میر سرفراز بگٹی نے صدر پی ایچ ایف کا منصب سنبھالنے پر مبارکباد پیش کی اور نیک خواہشات کا اظہار بھی کیا۔ انہوں نے کہا کہ پاکستان ہاکی کی خدمت کے لئے ہمہ وقت حاضر ہوں۔ انہوںنے کہا کہ وزیراعظم پاکستان انوار الحق کاکڑ کے ممنوں ہیں کہ انہوں نے پی ایچ ایف کے معاملات کیلئے ایک موزوں شخصیت کا انتخاب کیا۔
میر سرفراز بگٹی نے کہاکہ پاکستان ہاکی فیڈریشن کو کڑی نظر رکھنے والے ایڈمنسٹریٹر کی ضرورت تھی جوپوری ہوگئی، اور میر طارق حسین بگٹی پاکستان ہاکی کا مثبت چہرہ ثابت ہونگے۔

صدر پاکستان ہاکی فیڈریشن میر طارق بگٹی نے سرفراز بگٹی کا شکریہ بھی ادا کرتے ہوئے کہا کہ میں توقعات پر پورا اترنے کی کوشش کرونگا،پاکستان ہاکی کے معاملات بہت خراب ہیں تاہم انکے موثر حل کے لئے اقدامات لے رہے ہیں،کھلاڑیوں کی فلاح و بہبود اور پاکستان کی بین الاقوامی ایونٹس میں شرکت کو یقینی بنانا اولمپین ترجیحات میں سے ہے۔ انہوں نے یہ بھی کہا کہ پاکستان ہاکی فیڈریشن کے پاس اپنا ذاتی سپورٹس انفراسٹرکچر موجود نہیں تاہم سندھ حکومت کی جانب سے عبدالستار ایدھی ہاکی سٹیڈیم کراچی کی تعمیر نو کا منصوبہ پائپ لائن میں ہے جس کو پایہ تکمیل تک پہنچانے کی بھرپور کوشش کروں گا تاکہ پاکستان ہاکی فیڈریشن کے بینر تلے میں انٹرنیشنل معیار کا سپورٹس سٹیڈیم قائم کیا جاسکے۔ اور ہاکی کو بین الاقوامی سطح پہ بہتر بنایا جا سکے.